لسا طفل للكاتبة مريم القالع
لسـه طفل
أنا طفل عاش بيعيَّط من ساعة ما تولد
قرر يعيش فِـ الدُنيا من غير سنـَد
عايش فقير فِـ الدُنيا حيلي اتهد
وأنا طفل اه لكني عايش مهزوم
بضحك بلاقي الدُنيا مبتضحكش
بحلم بلاقي الحلم متحققش
بجزع بشوف الصبر مبيجزعش
أنا طفل اه لكني بقدر أقوم ..
عايش براضي الخلق فَـ اتراضىٰ
بسمع كلام القُـرب وأتغاضىٰ
عايش بخطي الخطوة وأتحمِّل
وأشرب يوميها السـِم كَـ العادة
بسمع كلامهم فِـ المنام بتفزِع
بلمح طيفهم المُريب فا أتخلِـِع
بضحك يقولوا الضحكة دِي تتمنِع
زيِّ اللي عاش محكوم عليــه بعياط ..
فيه لحظة مرت من حياتُـه اتصدَم
طفل سِنـًّا كأنُه شاب اتعدَم
لحظة ما سابوا الكُل قلبُــه اتخلـَع
قرر يعيش معزول اكمنُه مرَّة اتهدَم
طيَّـب ..زيِّ اللي عاش فـِ الدُنيا بيعيـَّط
فكَّـر يروح للقُرب ضحكوا عليــه
طيـَّب ..زيِّ اللي شاف عجوزة بتعدي
وقَّف طريقُـه يسند بكفّ إيديــه
مرَّ عليه العُمر مفرحشِ
كانت نتيجتُه بإنُـه منجحشِ
قرر يموَّت نفسُـه مقدرشِ
عايش بـ عين الكُل منصفهوش
صاحبُـه القُريَّـب ملقهوش جانبُـه
عايش بيفتح بابُـه ويسدُّه
كاره يعيش الدُنيا بتهدُّه
فيه لسه قلب معاه ومهزمهوش
غايب في أوضتُه مبتشوفوش الشمس
عايش حياتُـه بالهدوء والهمس
بيكره يطبطب حد تاني عليه
بقا عنده فوبيا من السلام باللمس
كان حد قالُّه من زمان هتموت
السِن زاد والعُمر بقا بيفوت
مستني كلمة العجوز تتحقق
زيِّ اللي صابُه السهم بطَّل يطلع صوت
بيضحك يوَّزع ضحكُه ع الأطفال
ماشي بيملا في البيوت أنوار
عايش بيلمِس للجميع أعذار
عايش حياتُـه بين ضجيج وسكوت
وكفايـَة سرد لحد ما هنكبر
نضحك وغصب عن السنين نظهر
طفل لكن في الحياة يقدر
يعيش عُمرُه الباقي كَـ الأبطال
كان حد قال الطفل دا يبقي أنا
لكن حقيقي الطفل عاش بينكُم
يمكن يكون الطفل دَا انتُم
خايفيـن نعافـِر وقلوبنا كَـ الأطفال _"
لـ مريَم ربيع القالـِع.
مُحـافظة القليوبيـَه.
ليست هناك تعليقات:
إرسال تعليق