الاذي النفسي
بقف مصدومه ومستغربه كده قصاد ناس مبتعرفش تقول انا غلط ف الموقف ده ...
او تعتذر عن أسلوب أو طريقه مكنوش احسن حاجه ف الكلام ..
دول ناس عندهم استعداد كمان أنهم يخسروا ناس قريبه منهم بسهوله
وينسوا ف لحظه زعل كل مواقفك اللي كنت فيها معاهم ؛
ناس معقده الحياه وتفاصيلها ...
شايفين طول الوقت أنهم صح ومبيغلطوش وبيرموا وقتها كمان اللوم عليك
للاسف النوع ده من الناس موجود ف حياه اغلب الناس مننا
وبكل امانه اوقات كتير بنقرر اننا نعدي ونسامح ونكبر دماغنا لمجرد اننا بنحبهم وغالين علينا وبندي وقتها مليون عذر
ويرجع بعدها نفس الموقف يحصل وترجع ازمتك والصراع اللي جواك مابين اعدي الدنيا واسامح زي كل مره ولا كفايه كده؟!
في الحقيقه هو لا كفايه كده فعلا
اعملوا stop للناس اللي ممكن ترهقكم وتوجعكم
كلنا بنمر بأزمات ومواقف صعبه اللي للاسف بقيت مجرد شماعات وحجج بايخه بنرمي عليها أخطائنا
كلنا الدنيا ملطشه معانا ومضغوطين بس مش كلنا عندنا درجه الاذي النفسي اللي بنرميه ف كلامنا ورد فعلنا طول الوقت من غير محس باللي قدامي لمجرد اني اتعودت منه أنه هيغفرلي ويعدي الدنيا عادي
لازم اخد بالي أن اللي قدامي مهما كانت درجه المحبه بينا مش طول الوقت هيبقي عنده نفس درجه الغفران
كلنا عندنا طاقه بتخلص ف وقت معين
الكلمه الحلوه بتهد جبال من الخصام ..
لكن الاذي النفسي اللي عملتوه ف جمله اتقالت بيفضل محفور سنين
جورجينا امجد
خواطر اول الليل
عالم الكتابة| جريدة إرتجال
تابعي و الله كتاباتك حلوة كتير و تشجع البعض و تعطينا افكار و معلومات جديدة نتعلمها بشكرك ℹ💛
ردحذف