في اغنيه عظيمه كلكم عرفينها عملها المبدع "محمد فؤاد"
اسمها الحب الحقيقي
(الحب الحقيقي بيعيش يا حبيبي
بيعلمنا نسامح بينسينا امبارح
بيعلمنا نفكر دايما ف ايامنا اللي جايه )
كل واحد عنده معني وتفسير للحب من وجهت نظره هو
عنده مخطط لحياه هيتولد فيها من جديد
الحب بالنسبالي ولاده جديده مع الشخص اللي قررت تتولد علي ايده واعيش أحداث لحياتي الجديده معاه
من اول طفولتي لحد منعجز انا وهو سوا
الحب اني ابقي عارفه أمتي اكون طفلته وامتي اكون صاحبته وامتي اخد دور الام اللي بتنصح وتطبطب
الحب مفهوش حدود وتسلط وتحكيم راي مفهوش انا الراجل وانتي الست ولا محاوله أنه يلغي دوري وهدفي ويقف قصاد حلمي وطموحي ..
مفهوش وجود للخيانه حتي لو مجرد كلمه ولا قابل للبعد وكسره خاطر وقت زعل
الحب عهد وطريق اتنين قرروا يمشوا فيه سكتهم
عارفين يخلقوا طول السكه دي زرع ويقلعوا اي شوكه بتتولد قصادهم .. جايز ف السكه تعورهم بس حبهم قادر يداوي الجروح
الحب أنه يكونلك اب تجري عليه مش تجري منه عشان خايفه .. منطقه امان وسط كل محارباتك اللي بتعدي بيها ف يومك
ام كلثوم ف اغنيه ليها قالت ( ازاي اوصفلك يا حبيبي قبل محبك كنت ازاي ) وبالنسبالي لخصت كلامي اللي جاي
الحب اني اقف قصاد" المعجزه" عاجزه اني اوصف ازاي حياتي اتغيرت ١٨٠ درجه
ربنا يبعتلكم المعجزه اللي تشقلب حياتكم
#خواطر_اول_الليل
جورجينا امجد
جريدة إرتجال | عالم الكتابة
ليست هناك تعليقات:
إرسال تعليق