عهد : تمام يا دكتورة
اعرفكم: منار دكتورة نفسيه فاتحة عيادة خاصة بيا بجانب اني بكتب ، عهد السكرتيرة بتاعتي
في كام مريض انهاردة يا عهد
= 5حالات يا دكتورة
هاتيلي الملفات بتاعتهم أقرأها و ادخل لهم
= حاضر
بقرأ في أول ملف لقيت إن بنت عندها 15 سنة بتعاني من التنمر من الأهل و الأصدقاء بسبب انها مليانه شوية لدرجة إنها دخلت في حالة اكتئاب و مبتخرجش من اوضتها ولا بتكلم مع حد ، افكار كتيرة في دماغي و منها ممكن كلمة من حد توصل شخص إنه ينعزل تماما لوحده
لقيت إن مش كلمة من شخص واحد بس ده من كل شخص كلمة ، كلمة على كلمة بتدينا كلمات كدة خلاص اتعرف الشخص اللي قدامنا اتعقد .(تنمر)
دخلت على تاني ملف لقيت بنت عندها 10 سنين بتعاني من كهربا زيادة في المخ بتخليها تقطع في الكلام + إن تلقائي بترمش بعنيها كتير و تحرك راسها و هيا بتكلم زمايلها في المدرسة بيتريقو عليها كتير و خلاها تدخل في حالة اكتئاب إن هيا بتحاول تقلل من الكلام خالص و احيانا بتستعمل لغة الإشارة كمان .(تنمر)
تالت ملف طفل عنده 9 سنين طول الوقت بيعيط و ( هنعرف السبب ) .
رابع ملف بنت متعقدة بسبب إن علطول صحابها ماشين مع بعض و هيا لوحدها كل ما بتروح لواحدة بتبقا مشغولة مع التانية و مش مداياها اهتمام (وحدة)
خامس ملف ( كسر مشاعر )
دخلت على أول أوضة .
انا منار تقدري تعتبريني اختك الكبيرة عاتشي جدا و نبقا صحاب كمان ثم ايه الخدود القمر ديه تعرفي إني بحب الناس القلبوظة اوي خصوصا ان هما بيبقو قمرات كدة
= ضحكت بس
الله و ضحكتك كمان حلوة كدة كتير أكاد من فرط الجمال اذوب اعرفك على نفسي طااه طالما مش حبتيني و مش عايزة تكلمي معايا ( زعل مصطنع )
= اتكلمت بسرعة لا خالص بالعكس حبيتك اوي
الله ما طلعنا بنتكلم أهوه و صوتنا حلو مش بتكلميني ليه و تعرفيني عن نفسك كدة
= اتكلمت بغضب انا مش عايزة اتكلم مع حد سيبيني لوحدي
طب في حد يسيب القمر ده لوحده
= ضحكت
ايوة كدة اضحكي خلي الشمس تطلع . بصي بقا يا ستي هعرفك عليا الأول و بعدين تعرفيني على نفسك اشطا
= اشطا
انا منار بحب القراءة جدا جدا و بحب اكتب و اندمج و انا بكتب كدة مش بحب اسمع لانتقادات اي حد دايما عارفة إن ربنا هو اللي خالقني مينفعش اي حد يقيمني على مزاجه و انتي بقا
= انا ريهام في تالتة اعدادي علطول الكل بيفضل يقولي انتي تخينه جدا كملت بعياط عمر ما حد قالي انتي حلوة زي ما اكون انا اللي خالقة نفسي انا ليه ربنا خلقني تخينه يا منار
حبيبه منار خالص مين اللي قال انك وحشة بس ده هو اللي وحش دايما اي حد بيقول علينا كلمة وحشة هو بيبقا عنده نقص و بيطلعه على اللي حواليه متسمحيش لحد يقلل من ثقتك بنفسك شوفي كدة انعزلتي و مبقتيش تكلمي مع حد كل ده بسبب ناس قالو عليكي كلام وحش ربنا خالقك في أبهى صورة ثم مينفعش ترجعي عن إيمانك خالص ربنا عارف إن انتي بشكلك ده حلو ممكن كنتي تبقي رفيعة بس شكلك مش حلو مش لايق على تدويرة وشك مثلا اوعي في يوم تقولي انا وحشة و ربنا خلقني كدة ليه .
= تمام يا دكتورة
توعديني تخرجي من حالتك ديه و تواجهي الكلام كله بتاع الناس و ميأثرش فيكي
= ضحكت اوعدك
خرجت من اوضتها و انا مرتاحة نوعا ما على أنها قدرت تكلم معايا حتى و تضحك كمان .
عهد : اتكلمتي معاها
منار : اه نوعا ما حسيت انها إتحسنت
عهد خرجت من أوضة المكتب و قرأت في الكتاب بتاعي عقبال ما يجي معاد المريض التاني ، بين كل مريض و مريض نص ساعة بحيث إني لو إتاخرت عند مريض جوا ادخل للمريض التاني في معاده .
دخلت ل تاني مريض
منار : ازيك
دورت وشها الناحية التانية بسرعه و متكلمتش معايا
منار : علفكرة انا بحب اسم كارما جدا و شكلي هحبك .
طب هفضل اكلم نفسي كدة كتير و مترديش عليا ده انا ازعل حتى .
طب انا معايا شوكولاتات حلوة كتير
= دورت وشها عليا بسرعة و بدأت ترمش و تبص عليا
كارما : فين انا عايزة واحدة
= كل كلمة كانت بتقولها كانت بترمش و ترفع حواجبها و متبصش في عينيا
منار : اتفضلي يا ستي
كارما : شكرا
منار : ممكن تتكلمي معايا يا كارما ؟ انتي اكيد عايزة يبقا عندك صحاب و تخرجي و متقعديش هنا كتير انا اقدر اساعدك بس لو اتكلمتي
كارما بعياط و تقطيع في الكلام : انا محدش بيحبني كله بيفضل يتريق عليا بصي انا بتكلم ازاي مش بتكلم زي الناس حتى انا مش حلوة و محدش بيفهم كلامي كله بيضحك عليا
منار : عارفة يا كارما يا قمر انتي شكلك جميل و مختلفة عن الناس كلها يعني كله بيتكلم زي بعضه لكن انتي مختلفة ليه متشوفيش انها ميزة مش عيب و شكلك لطيف جدا حتى إني اندمجت معاكي في الكلام انا عايزاكي تحبي نفسك خالص و تحمدي ربنا كتير خالص و تذاكري كويس عشان تبقي شطورة و تطلعي من الأوضة عندي هنا هرن على بابا و ماما يجو ياخدوكي و اقولهم إن كوكي بقت حلوة و هتكلم معانا و اقولك على حاجة كمان انا اديتك اتنين شكولاتة بس لو وعدتيني تكلمي مع كله و متخافيش من حاجة و اي حد يقولك كلمة تدايقك ابعدي عنه خالص و قوليله ربنا يسامحك و ربنا هيحاسبه على اي كلمه وحشة قالها لحد
كارما : اوعدك بس هاتي الشوكلاته بقا
منار : مستعجلة انتي ها خدي يا كوكي
= مالت عليا و باستني
كارما : بحبك اوي
منار : وانا اكتر يا كوكي يلا روحي جهزي هدومك و هرن على بابا و ماما يجو ياخدوكي اوكاي ؟
كارما : اوكاي .
طلعت من اوضتها وانا مبسوطة اول يوم انهاردة الحالات كلها تستجيب بسرعة كدة
دخلت اوضتي و ندهت على عهد
عهد : نعم يا دكتورة
منار : عايزاكي تطلعيلي رقم والد ريهام و كارما حالتهم بدأت تستجيب و عايزين نطمن أهلهم و كمان ممكن يطلعو
عهد : تمام يا دكتورة
( بعد خمس دقائق )
عهد : الأرقام اهيه يا دكتورة
منار : السلام عليكم معايا استاذ إبراهيم والد ريهام
إبراهيم : ايوة انا مين معايا
منار : انا الدكتورة اللي متابعة حالة ريهام بنت حضرتك عايزة حضرتك تيجي تشرفني في المكتب حضرتك و والدتها
إبراهيم : تمام اكيد هنيجي الساعة كام
منار : الساعة 7 كويس
إبراهيم : تمام إتشرفت بحضرتك
منار : الشرف ليا يا فندم .
تسريع أحداث : ( اتصلت على والد كارما و هيجي ياخدها و فرح انها إتحسنت و حكتله مشكلتها )
دخلت لتالت حالة
منار : ازيك يا أسر
أسر بلدغة في حرف ال س: كويث ( كويس )
منار : اسمك حلو يا أسر
أسر : ثكرا ( شكرا )
منار : سمعت انك بتعيط كتير يا اسورة ليه بتعيط مش الأطفال الحلوة بتعيط في المواقف الوحشة بس مش كل شوية تعيط من غير سبب
أسر بعياط : ملكيش دعوة بيا
منار : خلاص متعيطش انا بس بقولك إن كل ما تعيط كل ما عنيك هتوجعك و إنك لو عرفتنا بتعيط ليه هنساعدك جامد اوي و مش هنخليك تعيط
أسر : بابا علطول في الشغل و ماما بتقعد عالتليفون طول الوقت و مش بترضا تلعب معايا و بابا بيجي من الشغل ينام و مش يقعد معايا برضو و ماما بتزعقلي جامد اوي قد الثما ( السما ) كدة اول ما اقولها عايز العب معاكي بلايستيشن و ي إما تقعد على التليفون ي إما تعمل اكل و حجات في البيت و مش بتقعد معايا خالص
منار : ممكن متعيطش الأول بس و بعدين نتكلم
أسر : حاضر
منار : بابا بيشتغل كتير عشان يجيب ليك اكل و يديك مصروف و يجبلك هدوم كل حاجة بتيجي من فلوس بابا صح يا حبيبي ؟
أسر : صح
منار : فعشان كدة بابا بيجي تعبان لانه بيشتغل كتير عشان يجبلك كل حاجة انت عايزها و ماما ممكن تكون بتعمل حجات عالتليفون او بتكلم حد خالتو ، خالو ، بابا اي حد و بتروق البيت عشان تقعدو في مكان نضيف و بتعمل اكل عشان انت و بابا و إخواتك تاكلو و هيا بتبقا تعبانه اوي ف مش قادرة تلعب بتبقا عايزة ترتاح لأن حجات البيت صعبة برضو يعني انت مثلا تقدر تعمل اكل و تقف عالبوتجاز اكيد لاء ف هيا بتبقا تعبانه بس عارف يا أسر يا قمر انت انا هقول لماما تلعب معاك كتير و مش تزعقلك بس انت كمان لازم تسمع الكلام و تبقا شطور و تساعد ماما ماشي يا قمور ؟
أسر : ماشي بس انتي اثمك ايه ( إسمك )
منار : اسمي منار يا أسر
أسر : ماثي( ماشي ) يا ابله منار
منار : احلى ابله منار ديه ولا ايه
منار : يلا باي باي يا أسر و لو في اي حاجة مزعلاك قول لماما عايز اروح عند منار و هيجبوك ماشي يا حبيبي
أسر: ماثي يا ابله ( ماشي )
منار : يا عهد
عهد : نعم يا دكتورة
منار : خدي أسر القمر ده و إديله شوكلاته و ابعتيلي باباه و مامته
عهد : حاضر يا دكتورة
بعد دقيقتين الباب بيخبط
منار : اتفضل
والدة أسر : انا والدته بسنت و ده باباه علي
منار : تشرفت بحضراتكو
بسنت : الشرف لينا اكيد
منار : مشكلة أسر إن انتو مش بتقعدو معاه ولا بتلعبو معاه خالص
علي : انا من شغلي ل نومي مفيش وقت
منار : انا مع حضراتكو اكيد و جبت اسباب لأسر و هو مش زعلان بس قولتله إني هقول لبابا و ماما يلعبو معاك ، مفيش مانع اكيد إن لو في يوم اجازة تلعبو مع أسر شوية او تجيبو حاجة هو بيحبها او تخرجو شوية ديه حاجة هتبسطه كتير علاج أسر في أيديكم انتم الايام اللي جاية لازم تعملو كل حاجة هو بيحبها بحيث إنه ينسا و في نفس الوقت يبطل عياط .
بسنت و علي : شكرا كتير يا دكتورة
منار : ده شغلي يا فندم و لو في اي مشكلة تابعو معايا برقم التليفون
بسنت و علي : تمام
خرجو من الأوضة لقيت فاضل ربع ساعة على معاد الحالة شربت كوباية عصير و قعدت اقرأ في الملف بتاعها و بعدين دخلت ليها لقيتها مستنية
منار : ازيك يا علياء
علياء : كويسة
منار : حاسة ب ايه يا علياء
علياء : حاسة إني وحيدة معنديش صحاب تعرفي بكون ماشية مع صحابي مسافة ما بيلاقو صحابهم التانين بيسبوني و يمشو مش بحس إني محبوبة من حد مش بشارك حد تفاصيل حياتي او بمعنى أصح محدش مديني فرصه حاسة ان اي حاجة تهزني علطول بعيط مش عايزة اعيش كمان طب قوليلي كدة هعيش ليه مفيش حاجة اكمل عشانها مفيش دعم اهل مفيش دعم صحاب كله صفر تعبت بجد بحاول اعمل حجات كتير عشان يحبوني و يقدروني مش بلاقي تقدري تقوليلي ايه الحل
منار : هسألك سؤال انتي دلوقتي عندك مثلا صحبة بتحبيها جدا جدا و هيا بتحبك اوي و مش عندك غيرها و بتهتمو ب بعض و كل حاجة مع بعض ايه هيبقا إحساسك
علياء : هبقا فرحانة اكيد
منار : افرض مثلا اختفت من حياتك فجأة او بعد الشر ماتت اكيد هتقعي هتعيطي و هتحسي انك وحيدة و مش هتبقي عايزة حاجة في حياتك اللي عايزة اوصلهولك إن مينفعش تخلي سندك كله على حد لازم تسندي نفسك ، مش عشان معندكيش صحاب متحبيش حياتك ، مش عشان مفيش دعم تتمني انك تموتي ، فيه حجات كتيرة في حياتك لازم تاخدي بالك منها ، فيه دراسة ، فيه قراءة ، فيه حجات كتير ممكن تكوني بتحبيها تعمليها و تشغلي وقتك فاهماني حبي ذاتك هتلاقي اللي يحبك ممكن يكونو شايفينك ضعيفة ف مش مقربين منك تقدري كمان تبعدي عن الناس اللي في حياتك و تكوني ناس جديدة فاهمة الحياة هتتعاش بالطول او بالعرض يبقا نعيشها صح مقتنعه بكلامي يا علياء
علياء : اه خالص كلامك دخل جوايا والله
منار : حبيبتي جدا والله لو حبيتي في اي وقت تجيلي العيادة مفتوح و كمان تقدري تاخدي رقمي من السكرتيرة بتاعتي اسمها عهد برة
علياء : تمام هعمل زي ما قولتي اكيد و شكرا اوي
منار : لا شكر على واجب يا حبي
كنت اتأخرت ف عهد دخلت ليا الحالة اللي بعد ديه علطول
منار : اقعدي ع الشازلونج يا قمر
مريهان : تمام
منار : عرفيني بنفسك بقا يا قمر
مريهان : إسمي مريهان عندي 20 سنه الكل بيجرح مشاعري بتكسر من كله يعني مثلا قاعدين قعدة عائلية اتكلمت ولا حاجة ممكن يحرجوني عادي كنت بتكلم في موضوع مثلا و نسيت اقول نقطة ف يقولولي قولي الموضوع كله ي إما متكلميش مع انهم ممكن يفكروني بطريقة اني مش بيراعو انس كبيرة و عندي 20 سنة صحابي دايما بيجرحوني برضو ممكن يكدبو عادي و بعرف بس مش بقول إني عرفت خالص لاني مش ببقا قادرة حتى اتكلم في الموضوع تاني لأن ليه يكدبو عليا اعذارهم كل مرة بتبقا بايخة ، ممكن اكون رايحة لحد و فرحانة اوي مش بلاقي منه رد فعل حلوة يعني المفروض يعمل نفسه فرحان حتى لاء مفيش بحس إني مليش مكان لما بروح عند واحدة منهم ، بعيط و محدش بيديني إهتمام بجد انا تعبانه .
منار : متديش لحد إهتمام خالص كل واحد فيه عيوبه و هما اذوكي نفسيا سواء هما عارفين ولا لاء حاولي تنسي اتغلبي على كل ده صاحبي ناس جديدة عشان تنسي القدام بس في نفس الوقت متديهمش الثقة الكامله عشان ميحصلش فيكي اي حاجة من اللي حصلت ديه و حبي نفسك لو حبيتي نفسك كل مشاكلك هتتحل تمام يا مريهان ؟
مريهان : تمام
منار : باي يا قمر
مريهان : باي
خرجت من الأوضة و جهزت نفسي و خرجت يلا يا عهد نروح خلصت كله الحمدالله و اول مرة بجد الحالات تستجيب بالطريقة ديه
عهد : كله بفضلك يا دكتورة
منار : بفضل ربنا الأول يا عهد انا هروح دار المسنين شوية و بعدين هروح
عهد : تمام باي
بابا رن عليا
بابا : ايه يا منار عامله ايه
منار : الحمدلله يا بابا بخير
بابا : خلصتي شغل
منار : اه خلصت بس هروح دار المسنين و كدة و بعدين هاجي
بابا : تمام خلي بالك من نفسك و متتأخريش
وصلت عند دار المسنين و دعيت لماما و بابا بطولة العمر و عيني دمعت تلقائي إن في اولاد بتودي باباهاهم و مامتهم دار المسنين مش متخيلة إن مامتك و باباك اللي جايبينك عالدنيا ديه اللي استحملو و راحو قدمو في مدارس و كبروك و علموك تبقا جزاتهم انك مش قادر تهتم بيهم و توديهم دار المسنين و بعدين هديت نفسي شوية و لقيت إن زي ما فيه الوحش فيه الحلو ، الحلو إن ممكن يكونو مش معاهم قدرة المال و المعيشة الكويسة ف ودوهم دار مسنين عشان يعيشو احسن لأن ممكن معاهم هما مياكلوش اساسا و ميلاقوش علاج حتى دخلت و إتكلمت مع كذا حد شوية و حاولت اخفف عنهم و بعدين روحت البيت .
خبطت الباب
منار : ازيكم
ماما : حمدلله على سلامتك
منار : تسلميلي يا ماما
اتعشيت و قرأت شوية و كتبت شوية برضو و نمت بعد كدة صحيت عملت روتين كل يوم و في النهاية ( عملت كتاب و تم التوقيع عليه )
تمت ...
اسكريبت بعنوان : مشاكلك ليها حلول
الكاتبه : منار سيد
جريدة إرتجال|عالم الكتابة
ليست هناك تعليقات:
إرسال تعليق