انا لازم اشكر كل حد أذاني لأنه ساعدني أشكل مني شخصية جديدة أقوي وأحلى، بعد كل التجارب والحروب النفسية اللي كلنا بنعدي بيها، بتيجي علينا محطات مختلفة،
محطة إني أعدي وأكمل الطريق، وأنا قادر أتماسك وأبص لقدام بشكل مختلف،
ومحطة إني أختار أفضل واقف في مكاني متحركش منه، وناس تيجي وتروح، ومواقف وأحداث، وأنا ثابت مبتغيرش ولا قادر أرجع أقف علي رجلي من تاني ولا أتخطي كل اللي حصل...
كلنا غرقانين في بحر مواقف وتجارب صعبة عيشنا فيها أيام وليالي، وجع ودموع، وقلة نوم وتفكير؛ بس الجدع اللي موقفش عند محطة وفضل يزعل ويلوم في حظه الوحش ويلعن الناس والظروف،
الجدع اللي قدر يتحدي ويقاوم ويكمل من جديد، اللي قدر يدور علي نقطة نور ولو بسيطة جدًا ومسك فيها وسط الضلمة، دوروا علي القوة اللي جواكم وقوموا عافروا وكملوا،
اوعى ترفع راية استسلامك وتقول أنا انتهيت؛ لأن الحياة عمرها ما هتقف،
هتقدر تكمل؛ لإنك لازم تكمل حتى لو كنت متكسر،
حط قدام عينك ناس راهنت علي كسرك نصين، وقتها هتفهم معنى إنك لازم تكمل حربك، ومعافرتك ف الحياة
جورجينا أمجد
#خواطر_اول_الليل
جريدة إرتجال | عالم الكتابة
ليست هناك تعليقات:
إرسال تعليق